కేంద్ర ప్రభుత్వం జీఎస్టీ తగ్గించడంపై ఇప్పుడు విస్తృతంగా చర్చ జరుగుతోంది. ప్రజలకు డబ్బులు మిగులుతాయని అందరూ అంటున్నారు. అయితే ఎక్కువగా జరుగుతున్న చర్చ మాత్రం కార్ల గురించే. కార్లపై చాలా ఎక్కువగా డిస్కౌంట్లు వస్తున్నాయని చర్చించుకుటంున్నారు.
కార్లపై ప్రస్తుతం 28% ఉన్న అత్యధిక జీఎస్టీ స్లాబ్‌ను 18%కి తగ్గిస్తున్నారు. అదనంగా విధించే 1% నుంచి 22% వరకు ఉన్న కాంపెన్సేషన్ సెస్‌ను కూడా రద్దు చేస్తున్నారు. ఇంజన్ సామర్థ్యం , వాహన పరిమాణం ఆధారంగా 29% నుంచి 50% వరకు పన్ను విధించే కార్లు కూడా ఉన్నాయి.
చిన్న పెట్రోల్ కార్లపై 29% పన్ను ఉండగా, ఎస్‌యూవీలపై 50% వరకు పన్ను ఉంది. కొత్త జీఎస్టీ రేషనలైజేషన్ ప్రతిపాదనల ప్రకారం, చిన్న కార్లపై 1200 సీసీ కంటే తక్కువ పెట్రోల్, 1500 సీసీ కంటే తక్కువ డీజిల్ కార్లపై జీఎస్టీ 18%కి తగ్గనుంది. లగ్జరీ వాహనాలపై 40% ప్రత్యేక రేటు అమలు చేస్తారు. ఈ మార్పులు చిన్న కార్ల ధరలను 8% వరకు, పెద్ద కార్ల ధరలను 3-5% వరకు తగ్గిస్తాయని ఆటోమోబైల్ ఇండస్ట్రీ వర్గాలు చెబుతున్నాయి.
ఈ రేటు తగ్గింపు వల్ల మారుతి సుజుకి, మహీంద్రా అండ్ మహీంద్రా వంటి సంస్థలు గణనీయమైన ప్రయోజనం పొందనున్నాయి. మారుతి సుజుకి, దాదాపు 68% విక్రయాలు చిన్న కార్ల విభాగంలో ఉండటం వల్ల ఈ సంస్కరణల నుంచి అత్యధిక లాభం పొందే అవకాశం ఉంది. ఆటోమొబైల్ విక్రయాలను పెంచడం ద్వారా తయారీ రంగాన్ని ఉత్తేజపరుస్తాయి. ఫలితంగా, ఫ్యాక్టరీలు, డీలర్‌షిప్‌లు, అనుబంధ పరిశ్రమల్లో ఉపాధి అవకాశాలు పెరుగుతాయి. బ్యాంకులు , ఎన్‌బీఎఫ్‌సీలకు క్రెడిట్ వృద్ధి కూడా మెరుగుపడుతుంది.
జీఎస్టీ రేషనలైజేషన్ ఆటోమొబైల్ పరిశ్రమకు ఒక గేమ్-ఛేంజర్‌గా మారనుంది. ధరల తగ్గింపు, డిమాండ్ పెరుగుదల, ఉపాధి అవకాశాల సృష్టి, గ్రామీణ ఆర్థిక వ్యవస్థ బలోపేతం వంటి ప్రయోజనాలు ఉంటాయి. కార్ల కొనాలనుకున్న వారికి ఇది ఎంతో ఆకర్షణీయంగా ఉంటుంది. డిమాండ్ పెరుగుతుంది. జీఎస్టీ కౌన్సిల్ సెప్టెంబర్ 22 నుంచి ఈ కొత్త రేట్లను అమలు చేయనుంది, ఇది దీపావళి సీజన్‌లో వినియోగదారులకు ఒక ఆకర్షణీయమైన ఆఫర్‌గా మారుతోంది.
