విశాఖపట్నం: దేశంలోని చిన్న నగరాల్లో (Tier 2 cities) కొంతకాలంగా రియల్ ఎస్టేట్ మార్కెట్ నేలచూపులు చూస్తోంది. ప్రధాన నగరాల్లో కంటే విభిన్నంగాఉంది.2025 క్యాలెండర్ ఇయర్ మొదటి మూడు నెలల్లో (Q1 2025) ఇళ్ల అమ్మకాలు 8 శాతం తగ్గినప్పటికీ, వాటి విలువ మాత్రం 6 శాతం పెరిగింది. అంటే, తక్కువ ఇళ్లు అమ్ముడైనా, ఎక్కువ ధరలకు అమ్ముడయ్యాయని అర్థం. లేదా ఖరీదైన ఇళ్లకు గిరాకీ పెరిగి ఉండొచ్చు. ప్రముఖ రియల్ ఎస్టేట్ సంస్థ ప్రాప్‌ఈక్విటీ (PropEquity) ఈ మేరకు ఒక రిపోర్ట్‌లో తెలిపింది. మొత్తంగా, ఈ 15 చిన్న నగరాల్లో 2025 మొదటి త్రైమాసికంలో 43,781 ఇళ్లు అమ్ముడయ్యాయి. గతేడాది ఇదే సమయంలో 47,378 ఇళ్లు అమ్ముడయ్యాయి. అమ్మకాల సంఖ్య తగ్గినప్పటికీ, అమ్మకాల విలువ మాత్రం రూ. 38,102 కోట్ల నుంచి రూ. 40,443 కోట్లకు పెరిగింది.
విశాఖపట్నంలో సీన్ రివర్స్.. ఇక అత్యధికంగా లక్నోలో ఇళ్ల అమ్మకాలు ఏకంగా 25 శాతం పెరగ్గా.. ఇక్కడ మొత్తం 1301 ఇళ్లు అమ్ముడుబోయాయి. ఇదే సమయంలో తెలుగు రాష్ట్రాల్లోని ప్రముఖ టైర్-2 నగరాల్లో ఒకటైన విశాఖపట్నంలో ఇళ్ల అమ్మకాల సంఖ్య అత్యధికంగా తగ్గిందని రిపోర్ట్ పేర్కొంది. ఇక్కడ ఏకంగా గతేడాది ఇదే సమయంతో పోలిస్తే హౌసింగ్ సేల్స్ ఏకంగా 37 శాతం తగ్గడం గమనార్హం. ఇక అమ్మకాల విలువ కూడా ఇక్కడ 35 శాతం పడిపోవడం ఆందోళన కలిగిస్తోంది.ఇతర నగరాల్లో చూస్తే జైపూర్‌లో కూడా ఇళ్ల అమ్మకాలు 32 శాతం తగ్గగా.. భోపాల్‌లో 31 శాతం పడిపోయాయి. కోయంబత్తూర్‌లో 21 శాతం పెరిగాయి. ఇక్కడ అమ్మకాల విలువలో అయితే ఏకంగా 52 శాతం వృద్ధి నమోదు చేయడం విశేషం. గాంధీ నగర్‌లో ఇళ్ల అమ్మకాలు 18 శాతం పెరిగాయి. మొహలీలో 2 శాతం అమ్మకాల వృద్ధి కనిపించగా.. అహ్మదాబాద్, గోవా వంటి నగరాలు కేవలం 1 శాతం మాత్రమే వృద్ధి కనబరిచాయి.
అమ్మకాల విలువ ఎందుకు పెరుగుతోంది..? ఇళ్ల అమ్మకాల సంఖ్య తగ్గినా, వాటి మొత్తం విలువ పెరగడానికి రెండు ప్రధాన కారణాలు ఉండొచ్చు. ఇక్కడ ప్రధానంగా ఇళ్ల ధరలు పెరగడం వల్ల తక్కువ ఇళ్లు అమ్ముడైనా, మొత్తం ఆదాయం ఎక్కువగా వస్తోంది. ఇంకా కొనుగోలుదారులు చిన్న ఇళ్ల కంటే ఖరీదైన, పెద్ద ఇళ్లను కొనడానికి ఎక్కువగా ఆసక్తి చూపుతున్నారు.
డిమాండ్ తగ్గలేదా..? ప్రాప్‌ఈక్విటీ వ్యవస్థాపకుడు, సీఈఓ సమీర్ జసుజా మాట్లాడుతూ.. ‘అమ్మకాలు తగ్గడానికి డిమాండ్ తగ్గడం కారణం కాదని, బదులుగా కొత్త ఇళ్ల నిర్మాణం (సరఫరా) తగ్గడమే కారణమని’ చెప్పారు. జనవరి 2025 నుంచి ఆర్‌బీఐ రెపో రేట్లను 50 బేసిస్ పాయింట్లు తగ్గించింది, భవిష్యత్తులో మరిన్ని రేట్లు తగ్గొచ్చు. దీనివల్ల గృహ రుణాలు మరింత చౌకగా మారతాయి. ఇది చిన్న నగరాల్లో ఇళ్ల డిమాండ్‌ను తిరిగి పెంచుతుందని అంచనా.
