మంత్రాలయంలో గురు పౌర్ణమి ఉత్సవాలు ఘనంగా
మృత్తికా సంగ్రహణ మహోత్సవం భక్తిశ్రద్ధలతో నిర్వహణ
మంత్రాలయం, జూలై 29: కర్నూలు జిల్లా మంత్రాలయంలోని శ్రీ రాఘవేంద్ర స్వామి మఠంలో గురు పౌర్ణమి పర్వదినాన్ని పురస్కరించుకుని బుధవారం మృత్తికా సంగ్రహణ మహోత్సవాన్ని వైభవంగా నిర్వహించారు.
శ్రీ రాఘవేంద్ర స్వామి మఠం పీఠాధిపతి శ్రీ సుబుధేంద్ర తీర్థ స్వామీజీ దివ్య సన్నిధిలో వేద మంత్రోచ్చారణల మధ్య ఈ పవిత్ర కార్యక్రమం భక్తిశ్రద్ధలతో జరిగింది. సంప్రదాయం ప్రకారం శ్రీ మఠం నుంచి పవిత్ర తుంగభద్ర నది మధ్యనున్న తులసి వనం వరకు భారీ ఊరేగింపుగా వెళ్లిన స్వామీజీ అక్కడ పవిత్ర మృత్తికను సేకరించారు. అనంతరం ఆ మృత్తికను సువర్ణ పల్లకీలో భక్తిపూర్వకంగా శ్రీ రాఘవేంద్ర స్వామి బృందావనానికి తీసుకువచ్చి సంప్రదాయం ప్రకారం సమర్పించారు.
గురు పౌర్ణమి సందర్భంగా భక్తుడు వీణా బాలాజీ ఆధ్వర్యంలో శ్రీ సుబుధేంద్ర తీర్థ స్వామీజీకి చక్కెర మిఠాయి, బెల్లంతో తులాభార సేవ నిర్వహించారు. అనంతరం స్వామీజీపై పుష్పవృష్టి జరగగా, భక్తులు భక్తి, గౌరవాలకు ప్రతీకగా పూల వర్షం కురిపించారు.
ఈ సందర్భంగా శ్రీ సుబుధేంద్ర తీర్థ స్వామీజీ భక్తులకు అనుగ్రహ సందేశం అందిస్తూ శ్రీ హరి, వాయుదేవులు, గురు రాఘవేంద్ర స్వామివారి కృపతో ధర్మబద్ధమైన జీవనం సాగించాలని ఆకాంక్షించారు. అనంతరం భక్తులను ఆశీర్వదించడంతో గురు పౌర్ణమి వేడుకలు ఘనంగా ముగిశాయి.
