ప్రొద్దుటూరు: మాజీ ఎమ్మెల్యే, వైసీపీ అధికార ప్రతినిధి రాచమల్లు శివప్రసాద్ రెడ్డి చేసిన వ్యాఖ్యలపై టీడీపీ మాజీ ఇంచార్జ్ ఉక్కు ప్రవీణ్ తీవ్రంగా స్పందించారు. ప్రొద్దుటూరు నియోజకవర్గంలో టీడీపీకి నాయకులు, కార్యకర్తలు లేరని ఎవరూ భావించవద్దని ఆయన అన్నారు. పార్టీ కోసం, పార్టీ నాయకులు, కార్యకర్తల కోసం తాను అండగా ఉంటానని స్పష్టం చేశారు.‘‘ప్రొద్దుటూరు నియోజకవర్గంలో తెలుగుదేశం పార్టీకి ఎవరు లేరనుకుంటున్నావా? పార్టీ కోసం, పార్టీ నాయకులు, కార్యకర్తల కోసం నేనున్నా. నేనుండగా టీడీపీ నాయకులు, కార్యకర్తల జోలికి వస్తే ఏం జరుగుతుందో చూస్తాం’’ అంటూ ఉక్కు ప్రవీణ్ ఘాటు వ్యాఖ్యలు చేశారు.టీడీపీ నాయకులు వాస్తవాలు మాట్లాడితే రాచమల్లు శివప్రసాద్ రెడ్డి జీర్ణించుకోలేకపోతున్నారని ఆయన విమర్శించారు. దమ్ము, ధైర్యం ఉంటే టీడీపీ నాయకులు, కార్యకర్తల జోలికి రావాలని సవాల్ విసిరారు.
చల్లా రాజగోపాల్పై వ్యాఖ్యలను ఖండించిన ప్రవీణ్
చల్లా రాజగోపాల్పై రాచమల్లు శివప్రసాద్ రెడ్డి చేసిన వ్యాఖ్యలను ఉక్కు ప్రవీణ్ తీవ్రంగా ఖండించారు. ప్రొద్దుటూరులో బీసీ నాయకులంటే రాచమల్లుకు గిట్టదని ఆరోపించారు. గతంలో రమేష్ యాదవ్ను ఇబ్బందులకు గురిచేసిన విషయం ప్రజలకు తెలుసని వ్యాఖ్యానించారు.అంతేకాకుండా, తన వద్ద ఉన్న కొందరితో లోపాయికారీ ఒప్పందాలు చేసుకుని వారిని టీడీపీలోకి పంపించారని రాచమల్లుపై ఉక్కు ప్రవీణ్ తీవ్ర ఆరోపణలు చేశారు. అయితే ఈ ఆరోపణలపై రాచమల్లు వర్గం నుంచి ఎలాంటి స్పందన వెలువడాల్సి ఉంది.
వ్యక్తిగత విమర్శలు మాని.. ప్రజా సమస్యలపై మాట్లాడాలి
రాజకీయ నాయకులు వ్యక్తిగత దూషణలకు దిగకుండా ప్రొద్దుటూరు ప్రజలు ఎదుర్కొంటున్న సమస్యలపై మాట్లాడాలని ఉక్కు ప్రవీణ్ సూచించారు. వైసీపీ ప్రభుత్వ హయాంలో ప్రొద్దుటూరులో వ్యాపారవేత్తలు, వర్తకులు తీవ్ర ఇబ్బందులు ఎదుర్కొన్నారని ఆయన ఆరోపించారు.చివరగా రాచమల్లు శివప్రసాద్ రెడ్డిని ఉద్దేశించి ఉక్కు ప్రవీణ్ అత్యంత ఘాటు వ్యాఖ్యలు చేశారు. ‘‘సమయం చెప్పు.. రాజగోపాల్తో కలిసి నీ ఇంటికే వస్తా’’ అంటూ సవాల్ విసిరారు. ఈ వ్యాఖ్యలు ప్రొద్దుటూరు రాజకీయ వర్గాల్లో చర్చనీయాంశంగా మారాయి.
Save or share this story as a newspaper-style Epaper Clip:
