హైదరాబాద్: రాష్ట్రంలో బెటాలియన్ కానిస్టేబుళ్ల ఆందోళనల వేళ పోలీసులకు ప్రభుత్వం గుడ్ న్యూస్ చెప్పింది. పోలీస్ సిబ్బందికి సరెండర్ లీవ్ల బడ్జెట్ రూ.182.48 కోట్ల విడుదలకు ప్రభుత్వం గ్రీన్ సిగ్నల్ ఇచ్చింది. ఈ మేరకు ఆర్థిక శాఖ మంగళవారం (అక్టోబర్ 29) ఉత్తర్వులు జారీ చేసింది. కాగా, పోలింగ్ సిబ్బందికి సరెండర్ లీవ్ల బడ్జెట్ రూ.182.48 కోట్ల మొత్తాన్ని మంజూరు చేస్తూ సీఎం రేవంత్ రెడ్డి, డిప్యూటీ సీఎం మల్లు భట్టి విక్రమార్క నిర్ణయం తీసుకున్నారు. సీఎం, డిప్యూటీ నిర్ణయానికి అనుగుణంగా పోలీస్ సిబ్బందికి సరెండర్ లీవ్లకు సంబంధించిన బడ్జెట్ను ప్రభుత్వం భారీ స్థాయిలో విడుదల చేసింది. ఎంతోకాలంగా పోలీస్ సిబ్బంది ఎదురుచూస్తున్న సరెండర్ లీవ్లకు సంబంధించిన బడ్జెట్ను విడుదల చేయడంపై పోలీస్ అధికార సంఘాలు హర్షం వ్యక్తం చేశాయి. మరోవైపు మిగిలిన బకాయిలను దశలవారీగా త్వరితగతిన మంజూరు చేసేందుకు ప్రభుత్వం కసరత్తు చేస్తోంది.
