కడప, మే 25 : సార్వత్రిక ఎన్నికల ఓట్ల లెక్కింపు ప్రక్రియ నిర్వహణ కోసం మొత్తం 1035 మంది కౌంటింగ్ సిబ్బందికి మొదటి విడత ర్యాండమైజేషన్ ద్వారా విధులను కేటాయించడం జరిగిందని జిల్లా ఎన్నికల అధికారి, జిల్లా కలెక్టర్ వి.విజయ్ రామరాజు పేర్కొన్నారు.శనివారం ఉదయం 10 గంటలకు కలెక్టరేట్ లోని ఎన్ఐసి హాలులో.. జిల్లా జేసీ గణేష్ కుమార్, జిల్లా ఎలెక్షన్ కంట్రోల్ రూమ్ ప్రత్యేక పర్యవేక్షకులు, కడప నగర కమీషనర్ ప్రవీణ్ చంద్, డిఆర్ఓ గంగాధర్ గౌడ్ లతో కలిసి జిల్లా కలెక్టర్, జిల్లా ఎన్నికల అధికారి వి.విజయ్ రామరాజు సార్వత్రిక ఎన్నికలు – 2024లో భాగంగా కౌంటింగ్ సిబ్బందికి విధులను కేటాయించే మొదటి విడత ర్యాండమైజేషన్ ప్రక్రియను చేపట్టారు.ఈ సందర్భంగా జిల్లా కలెక్టర్, జిల్లా ఎన్నికల అధికారి వి.విజయ్ రామరాజు మాట్లాడుతూ.. ఎన్నికల కమీషన్ నిర్ణయించిన ప్రకారం కౌంటింగ్ సిబ్బందికి.. నియామక ఉత్తర్వులను సంబంధిత తహసిల్దార్ల ద్వారా అందివ్వడం జరుగుతుందన్నారు. కౌంటింగ్ సిబ్బందికి కడప నగరం అన్నమయ్య సర్కిల్ లోని మునిసిపల్ కార్పొరేషన్ హై స్కూల్ (మెయిన్)లో 29-05-2024 తేదిన ఉదయం 09.00 గంటలకు ఓట్ల లెక్కింపు ప్రక్రియకు సంబంధించిన శిక్షణను కూడా ఇవ్వనున్నట్లు తెలిపారు. శిక్షణా తరగతులకు గైర్హాజరు అయిన సిబ్బంది పై ప్రజాప్రాతినిధ్య చట్టం -1951 ప్రకారము కఠిన చర్యలు తీసుకోడం జరుగుతుందన్నారు.మొదటి ర్యాండమైజేషన్ ద్వారా విధులను కేటాయించిన వారికి.. జూన్ 2వ తేదీన రెండవ ర్యాండమైజేషన్, జూన్ 4వ తేదీన ఉదయం 5 గం౹౹ లకు 3వ ర్యాండమైజేషన్ నిర్వహించి.. ఈ ఏ టేబుల్ లో కౌంటింగ్ నిర్వహించాలో తెలపడం జరుగుతుందన్నారు.ఈ కార్యక్రమంలో అన్ని నియోజకవర్గాల రిటర్నింగ్ అధికారులతో పాటు.. సీపీవో వెంకట్రావు, డీఐఓ విజయ్ కుమార్, సంబందిత అధికారులు తదితరులు పాల్గొన్నారు.
