ఒకప్పుడు టాలీవుడ్లో వరుస హిట్ సినిమాలతో గుర్తింపు తెచ్చుకున్న హీరో వడ్డే నవీన్ చాలా కాలంగా సినిమాలకు దూరంగా ఉన్న విషయం తెలిసిందే. తాజాగా ఆయన తన సినీ ప్రయాణం, సినిమాలకు విరామం ఇవ్వడానికి గల కారణం గురించి ఆసక్తికర విషయాలు వెల్లడించారు.నిర్మాత వడ్డే రమేష్ కుమారుడైన నవీన్, 1996లో వచ్చిన క్రాంతి సినిమాతో హీరోగా పరిచయమయ్యారు. ఆ సినిమా ఆశించిన స్థాయిలో విజయం సాధించకపోయినా, తర్వాత వచ్చిన కోరుకున్న ప్రియుడుతో మంచి గుర్తింపు సంపాదించారు. అనంతరం పెళ్లి, మనసిచ్చి చూడు, లవ్ స్టోరీ 1999, స్నేహితులు, చాలా బాగుంది, బాగున్నారా వంటి సినిమాలతో ప్రేక్షకుల్లో ప్రత్యేక స్థానం సంపాదించుకున్నారు.అయితే 2010 తర్వాత ఆయన సినిమాలకు క్రమంగా దూరమయ్యారు. చివరిసారిగా 2016లో దర్శకుడు రామ్ గోపాల్ వర్మ తెరకెక్కించిన ఎటాక్ సినిమాలో కనిపించారు.ఇప్పుడు దాదాపు పదేళ్ల తర్వాత కానిస్టేబుల్ త్రిమూర్తులు సినిమాతో మళ్లీ ప్రేక్షకుల ముందుకు రావడానికి సిద్ధమవుతున్నారు. ఈ సినిమా టీజర్ విడుదల సందర్భంగా జరిగిన కార్యక్రమంలో నవీన్ ఆసక్తికర విషయాలు పంచుకున్నారు.ఎటాక్ సినిమా షూటింగ్ సమయంలో జరిగిన ఒక సంఘటన తన ఆలోచనలను మార్చిందని ఆయన చెప్పారు. షూటింగ్ కొన్ని రోజులు పూర్తయ్యాక, దర్శకుడు రామ్ గోపాల్ వర్మ తనను కలిసి మాట్లాడారని తెలిపారు. “మీకు మంచి వ్యక్తిత్వం ఉంది. కానీ ఇలాంటి పాత్రలు చేయకూడదు. మీకంటూ ప్రత్యేకమైన సినిమా ఉండాలి” అని వర్మ చెప్పారని నవీన్ వెల్లడించారు.అప్పటికే తాను చేస్తున్న పాత్రలపై పూర్తిగా సంతృప్తిగా లేనని భావించిన నవీన్, ఆ మాటల తర్వాత కొంతకాలం సినిమాలకు దూరంగా ఉండాలని నిర్ణయించుకున్నట్లు తెలిపారు. అయితే పూర్తిగా నటనకు గుడ్బై చెప్పలేదని, తనకు నచ్చే మంచి కథ, ప్రేక్షకులకు కూడా నచ్చే సినిమా వస్తే తప్పకుండా నటిస్తానని చెప్పారు.ఇప్పుడు ఆయన రీ ఎంట్రీతో అభిమానుల్లో ఆసక్తి నెలకొంది. కానిస్టేబుల్ త్రిమూర్తులు సినిమా తర్వాత వడ్డే నవీన్ మళ్లీ బిజీ అవుతారా లేదా అనేది చూడాలి.
