అధికారులకు జిల్లా కలెక్టర్ డా. శ్రీధర్ చెరుకూరి ఆదేశం
కడప, నవంబర్ 12: జిల్లాలోని ఎనిమిది మున్సిపాలిటీలు, నగర పంచాయతీల్లో వైస్ చైర్‌పర్సన్ ఎన్నికలను పారదర్శకంగా, ప్రశాంతంగా, ఎన్నికల నిబంధనలకు అనుగుణంగా నిర్వహించాలని జిల్లా కలెక్టర్, జిల్లా ఎన్నికల అధికారి డా. శ్రీధర్ చెరుకూరి అధికారులను ఆదేశించారు.
రాష్ట్ర ఎన్నికల సంఘం విడుదల చేసిన నోటిఫికేషన్, ఎన్నికల షెడ్యూల్‌లో పేర్కొన్న మార్గదర్శకాలను తప్పనిసరిగా పాటించాలని స్పష్టం చేశారు. ఎన్నికల ప్రక్రియలో ఎలాంటి తప్పిదాలకు అవకాశం లేకుండా సంబంధిత శాఖల అధికారులు సమన్వయంతో పనిచేయాలని సూచించారు.
ఎన్నికల నిర్వహణలో భాగంగా కలెక్టర్ అధికారం కల్పించిన గెజిటెడ్ అధికారి నవంబర్ 18న అనుబంధం-II ప్రకారం ప్రత్యేక సమావేశానికి నోటీసులు జారీ చేయనున్నారు. సంబంధిత చైర్‌పర్సన్, వార్డు సభ్యులు, ఎక్స్‌-అఫీషియో సభ్యులకు నోటీసులు అందజేయాల్సి ఉంటుంది.
నవంబర్ 23న ఉదయం 11 గంటలకు ఎన్నికలు
వైస్ చైర్‌పర్సన్ ఎన్నికల కోసం నవంబర్ 23వ తేదీ ఉదయం 11 గంటలకు ప్రత్యేక సమావేశం నిర్వహించనున్నారు. అనివార్య కారణాలతో ఆ రోజు ఎన్నికలు నిర్వహించడం సాధ్యం కాకపోతే నవంబర్ 24వ తేదీ ఉదయం 11 గంటలకు ఎన్నికలు నిర్వహించాలని నిర్ణయించారు. ఆ రోజు సెలవు దినమైనప్పటికీ ఎన్నికల ప్రక్రియ కొనసాగించాల్సి ఉంటుందని కలెక్టర్ తెలిపారు. నవంబర్ 24న కూడా ఎన్నికలు నిర్వహించలేని పరిస్థితి ఏర్పడితే రాష్ట్ర ఎన్నికల సంఘానికి నివేదించాలని, తదుపరి తేదీని సంఘం నిర్ణయిస్తుందని వివరించారు.
ఎనిమిది పట్టణ స్థానిక సంస్థల్లో ఎన్నికలు
జిల్లాలో రాజంపేట, ప్రొద్దుటూరు, పులివెందుల, బద్వేలు, మైదుకూరు, జమ్మలమడుగు, ఎర్రగుంట్ల, కమలాపురం మున్సిపాలిటీలు, నగర పంచాయతీల్లో వైస్ చైర్‌పర్సన్ పదవులకు ఎన్నికలు జరగనున్నాయి.
రాష్ట్ర ఎన్నికల సంఘం నిబంధనల ప్రకారం నిర్దేశిత గడువులోగా అన్ని ఏర్పాట్లు పూర్తి చేయాలని కలెక్టర్ అధికారులకు సూచించారు. ఎన్నికల నిర్వహణలో పారదర్శకతకు ప్రాధాన్యతనిస్తూ, ఎలాంటి నిబంధనల ఉల్లంఘనలకు తావులేకుండా బాధ్యతాయుతంగా విధులు నిర్వర్తించాలని ఆదేశించారు.
Save or share this story as a newspaper-style Epaper Clip:
