పదో తరగతి విద్యార్థిని పట్ల అసభ్య ప్రవర్తన ఆరోపణలు.. విచారణ నివేదిక ఆధారంగా విద్యాశాఖ చర్యలు
కడప జిల్లా: ప్రొద్దుటూరు పట్టణంలోని ఊటుకూరు వీరయ్య (ఎస్.వి.వి.) ప్రభుత్వ బాలుర ఉన్నత పాఠశాలలో పనిచేస్తున్న స్కూల్ అసిస్టెంట్ (గణితం) ఉపాధ్యాయుడు ఏ. నరసింహారెడ్డిని విద్యాశాఖ ఉన్నతాధికారులు సస్పెండ్ చేశారు.
నవంబర్ 13వ తేదీన పాఠశాలలోని పదో తరగతి విద్యార్థిని పట్ల సదరు ఉపాధ్యాయుడు అసభ్యకరంగా ప్రవర్తించినట్లు ఆరోపణలు వెలువడ్డాయి. ఈ ఘటనపై స్పందించిన విద్యాశాఖ అధికారులు నవంబర్ 16వ తేదీన ప్రొద్దుటూరు డివిజన్ ఉప విద్యాశాఖ అధికారి ద్వారా విచారణ చేపట్టారు. విచారణ అనంతరం రూపొందించిన నివేదికను కడప జిల్లా విద్యాశాఖ అధికారి (డీఈఓ)కు సమర్పించారు.
విచారణ నివేదికను పరిశీలించిన జిల్లా విద్యాశాఖ అధికారి ఆదేశాల మేరకు ప్రొద్దుటూరు ఉప విద్యాశాఖ అధికారి శివప్రసాద్ బుధవారం (నవంబర్ 18) ఉపాధ్యాయుడు ఏ. నరసింహారెడ్డికి సస్పెన్షన్ ఉత్తర్వులు జారీ చేశారు. ఈ ఉత్తర్వులు తక్షణమే అమల్లోకి వచ్చినట్లు అధికారులు వెల్లడించారు.
తదుపరి ఉత్తర్వులు వెలువడే వరకు సస్పెన్షన్ కొనసాగుతుందని స్పష్టం చేశారు. అలాగే సంబంధిత అధికారుల ముందస్తు అనుమతి లేకుండా హెడ్క్వార్టర్స్ను విడిచి వెళ్లకూడదని ఆదేశించారు.
విద్యార్థుల భద్రత, పాఠశాలల్లో క్రమశిక్షణకు ప్రాధాన్యతనిస్తూ విద్యాశాఖ ఈ చర్యలు చేపట్టినట్లు తెలుస్తోంది.
Save or share this story as a newspaper-style Epaper Clip: