వందల కోట్ల ఆస్తులపై అనుమానాం ఏసీబీ అధికారులు మేడ్చల్–రంగారెడ్డి జిల్లాల డిప్యూటీ కలెక్టర్ వంశీ మోహన్ నివాసం సహా పలు ప్రాంతాల్లో ఆకస్మిక తనిఖీలు నిర్వహించినట్లు సమాచారం. ఆదాయానికి మించి ఆస్తులు కూడబెట్టిన ఆరోపణలు, ప్రభుత్వ భూముల అక్రమ బదిలీల అంశాలపై ఈ సోదాలు చేపట్టినట్లు తెలుస్తోంది.ప్రాథమిక సమాచారం ప్రకారం, వంశీ మోహన్కు సంబంధించి వందల కోట్ల రూపాయల విలువైన ఆస్తులు ఉన్నట్లు అధికారులు గుర్తించినట్లు ప్రచారం జరుగుతోంది. నగర పరిధిలో భూములు, స్థిరాస్తులు, పెట్టుబడులు, రియల్ ఎస్టేట్ లావాదేవీలపై ఏసీబీ ప్రత్యేకంగా దృష్టి సారించినట్లు తెలుస్తోంది.అత్యంత కీలక ఆరోపణగా, ప్రభుత్వ భూములను తన మామ పేరు మీద రిజిస్ట్రేషన్ చేయించి, అనంతరం రియల్ ఎస్టేట్ వ్యాపారికి అప్పగించినట్లు విచారణలో ఆరోపణలు వినిపిస్తున్నాయి. ముఖ్యంగా అబ్దుల్లాపూర్మేట్ పరిధిలోని పిగ్లీపురం ప్రాంతంలో సుమారు 8 ఎకరాల ప్రభుత్వ భూమిని అక్రమంగా కాజేసి రియల్ ఎస్టేట్ వ్యాపారికి దారాదత్తం చేసినట్లు ఆరోపణలు ఉన్నాయి.గతంలో వంశీ మోహన్
శేరిలింగంపల్లి సహా పలు ప్రాంతాల్లో ఆర్డీవో (RDO)గా పనిచేసిన సమయంలో జరిగిన భూ వ్యవహారాలపై కూడా అధికారులు పాత రికార్డులను పరిశీలిస్తున్నట్లు సమాచారం. ప్రభుత్వ భూముల కేటాయింపులు, రిజిస్ట్రేషన్లు, అనుమతుల ప్రక్రియలో అక్రమాలు జరిగాయా అనే కోణంలో లోతైన విచారణ కొనసాగుతున్నట్లు తెలుస్తోంది.సోదాల్లో స్వాధీనం చేసుకున్న పత్రాలు, డిజిటల్ రికార్డులు, బ్యాంకు లావాదేవీలు, బినామీ ఆస్తులపై ACB అధికారులు పరిశీలన చేపట్టినట్లు సమాచారం. అధికారిక ప్రకటన వెలువడిన తర్వాత పూర్తి వివరాలు, ఆస్తుల అసలు విలువ, కేసుకు సంబంధించిన అంశాలు స్పష్టమయ్యే అవకాశం ఉంది.గమనిక: ప్రస్తుతం వెలువడుతున్న సమాచారం ప్రాథమిక నివేదికలు, ఆరోపణల ఆధారంగా ఉంది. ఏసీబీ అధికారిక ప్రకటన లేదా కోర్టు ప్రక్రియ అనంతరం పూర్తి వాస్తవాలు వెలుగులోకి వచ్చే అవకాశం ఉంది.
