పెన్నా తీరాన చారిత్రక–ఆధ్యాత్మిక వైభవం.. సమగ్ర పర్యాటక అభివృద్ధి కోసం ఎదురుచూపులు
కడప: కడపకు సమీపంలోని పెన్నా నది తీరాన వెలసిన పుష్పగిరి.. ఆధ్యాత్మికత, చరిత్ర, శిల్పకళల సమ్మేళనంగా ప్రత్యేక గుర్తింపు పొందిన పుణ్యక్షేత్రం. పురాతన ఆలయాలు, రుద్రపాదం–విష్ణుపాదం, పుష్పగిరి పీఠం వంటి విశిష్టతలతో ఈ క్షేత్రానికి ప్రత్యేక ప్రాధాన్యత ఉంది. శైవ సంప్రదాయంలో “మధ్య కైలాసం”, వైష్ణవ సంప్రదాయంలో మధ్య అహోబిలం గా భావించే పుష్పగిరిని స్థానికంగా దక్షిణ కాశి గా పిలుస్తారు.
Oplus_16908288
శిల్పకళకు నిలువెత్తు నిదర్శనం
పుష్పగిరిలోని చెన్నకేశవ స్వామి, వైద్యనాథేశ్వర స్వామి, త్రికూటేశ్వర స్వామి తదితర ఆలయాలు ఈ ప్రాంత ఆధ్యాత్మిక, చారిత్రక, శిల్పకళా వైభవానికి ప్రతీకలుగా నిలుస్తున్నాయి. శతాబ్దాల నాటి శాసనాలు, అద్భుతమైన శిల్పాలు పుష్పగిరి చారిత్రక ప్రాధాన్యతను చాటుతున్నాయి.
ఇంతటి విశిష్టత కలిగిన పుష్పగిరి మాత్రం ఇప్పటికీ పూర్తిస్థాయి ఆధ్యాత్మిక పర్యాటక కేంద్రంగా అభివృద్ధి చెందాల్సిన అవసరం ఉందనే అభిప్రాయాలు వ్యక్తమవుతున్నాయి.
మౌలిక వసతులు మరింత మెరుగుపడాలి
పర్యాటకులు, భక్తుల రాకపోకలకు అనుకూలంగా మెరుగైన రహదారులు, ఒక ఒడ్డు నుంచి మరో ఒడ్డుకు సులభంగా చేరుకునే రహదారి లేదా వంతెన, తగిన వాహనాల నిలుపుదల ప్రదేశాలు, తాగునీటి సదుపాయం, మరుగుదొడ్లు, పారిశుద్ధ్య నిర్వహణ వంటి మౌలిక వసతులను మరింత మెరుగుపరచాల్సిన అవసరం ఉంది.
అలాగే పుష్పగిరి చరిత్ర, ఆలయాల విశిష్టతలను వివరించే బహుభాషా సమాచార బోర్డులు, సంకేత గుర్తులు, ఆధునిక సమాచార సదుపాయాలను ఏర్పాటు చేస్తే దేశం నలుమూలల నుంచి వచ్చే పర్యాటకులకు ఎంతో ఉపయోగకరంగా ఉంటుంది.
ఆధ్యాత్మిక పర్యాటక వలయంగా అభివృద్ధి చేస్తే..
కడప నగరానికి, విమానాశ్రయానికి సమీపంలో ఉండటం పుష్పగిరికి ఉన్న ప్రధాన భౌగోళిక ప్రయోజనం. పుష్పగిరిని కడప జిల్లాలోని ఇతర ప్రముఖ ఆధ్యాత్మిక, చారిత్రక ప్రాంతాలతో అనుసంధానిస్తూ ఆధ్యాత్మిక పర్యాటక వలయంగా అభివృద్ధి చేస్తే పర్యాటకుల సంఖ్య పెరిగే అవకాశం ఉంది.
దీంతో స్థానికంగా హోటళ్లు, రవాణా, పూజా సామగ్రి, హస్తకళలు, చిన్న వ్యాపారాలు తదితర రంగాల్లో ఉపాధి అవకాశాలు కూడా పెరిగే అవకాశం ఉంది.
వారసత్వ పరిరక్షణకు ప్రాధాన్యం ఇవ్వాలి
పుష్పగిరిలోని పురాతన శిల్పాలు, శాసనాలు, ఆలయ నిర్మాణాలను శాస్త్రీయ పద్ధతుల్లో పరిరక్షించాల్సిన అవసరం ఉంది. పుష్పగిరి చరిత్ర, ఆలయాల విశిష్టత, శిల్పకళను సందర్శకులకు వివరించేలా ప్రత్యేక వారసత్వ సమాచార కేంద్రం ఏర్పాటు చేయాల్సిన అవసరం ఉంది.
పురాతన కట్టడాలను కాపాడటంతో పాటు వాటి చరిత్రను భవిష్యత్ తరాలకు అందించే విధంగా నిరంతర నిర్వహణ చేపట్టాలి.
ప్రచారం మాత్రమే కాదు.. సమగ్ర అభివృద్ధి కావాలి
పుష్పగిరికి కావాల్సింది కేవలం ప్రచారం కాదు.. సమగ్ర అభివృద్ధి ప్రణాళిక.
చరిత్రను కాపాడాలి..
ఆధ్యాత్మికతను ప్రపంచానికి పరిచయం చేయాలి..
పర్యాటకులకు మెరుగైన సౌకర్యాలు కల్పించాలి..
స్థానికులకు ఉపాధి అవకాశాలు కల్పించాలి..
“దక్షిణ కాశి”గా పేరొందిన పుష్పగిరి.. దేశ ఆధ్యాత్మిక పర్యాటక పటంలో ప్రత్యేక స్థానం సంపాదించేలా సమగ్రంగా అభివృద్ధి చెందాలని భక్తులు, పర్యాటకులు, స్థానికులు ఆకాంక్షిస్తున్నారు.
Save or share this story as a newspaper-style Epaper Clip:
