బీహార్: దాదాపు 35 ఏళ్ల క్రితం నమోదైన హత్యాయత్నం కేసులో 85 ఏళ్ల వృద్ధుడికి కోర్టు జైలు శిక్ష విధించిన ఘటన బీహార్ రాష్ట్రంలో చర్చనీయాంశంగా మారింది. దీర్ఘకాల విచారణ అనంతరం వైశాలి జిల్లా కోర్టు ఈ కేసులో తీర్పు వెలువరించింది.కోర్టు వివరాల ప్రకారం, హత్యాయత్నం మరియు ఆయుధాల చట్ట ఉల్లంఘన కేసులో నిందితుడిగా ఉన్న దీప్ రాయ్ (85)కు మూడు సంవత్సరాల కఠిన కారాగార శిక్షతో పాటు రూ.25,000 జరిమానా విధించారు. ఇదే కేసులో నిందితులుగా ఉన్న నాకేశ్వర్ రాయ్, నరేష్ రాయ్, ఉద్కేశ్వర్ రాయ్, జగదీష్ రాయ్లకు కూడా శిక్ష ఖరారు చేసింది.అయితే తీర్పు సందర్భంగా న్యాయమూర్తి మానవతా దృక్పథాన్ని ప్రస్తావించారు. ప్రస్తుతం వృద్ధాప్యంలో ఉన్న దీప్ రాయ్ శారీరకంగా బలహీనుడిగా, నడవలేని స్థితిలో ఉన్నారని కోర్టు గమనించింది. ఇలాంటి పరిస్థితుల్లో కఠిన శిక్షను భరించడం కష్టమవుతుందని పేర్కొన్నప్పటికీ, నేరానికి తగిన శిక్ష తప్పనిసరి అని స్పష్టం చేసింది. అందుకే కనిష్ట స్థాయి శిక్షను విధించినట్లు వెల్లడించింది.ఇక కేసు దాదాపు 35 ఏళ్ల పాటు కొనసాగిన నేపథ్యంలో, అంత కాలం విచారణను ఎదుర్కోవడం కూడా ఒక రకంగా శిక్షేనని కోర్టు అభిప్రాయపడింది. నిందితులంతా మొదటిసారి నేరానికి పాల్పడినవారేనని, వారి వయస్సును కూడా పరిగణనలోకి తీసుకోవాలని డిఫెన్స్ న్యాయవాదులు వాదించారు. ఈ వాదనలను పరిగణనలోకి తీసుకున్న కోర్టు తక్కువ శిక్ష విధించింది.కోర్టు ఆదేశాల అనంతరం నడవలేని స్థితిలో ఉన్న వృద్ధ నిందితుడిని పోలీసులు చేతులపై ఎత్తుకుని తీసుకెళ్తున్న దృశ్యాలు సోషల్ మీడియాలో వైరల్గా మారాయి. ఈ ఘటనపై పలువురు భిన్నాభిప్రాయాలు వ్యక్తం చేస్తున్నారు.
