డ్రగ్స్ కేసులో 23 ఏళ్ల మియా ఒబ్రెయిన్కు కఠిన శిక్ష
చెడు స్నేహితుల వల్లే పొరపాటు చేసిందన్న తల్లి
గత ఏడాది అక్టోబర్లో 50 గ్రాముల డ్రగ్స్తో పట్టివేత
సాయం కోసం ఏర్పాటు చేసిన ‘గోఫండ్మీ’ పేజీ తొలగింపు
దుబాయ్లో జీవిత ఖైదు అంటే 15 నుంచి 25 ఏళ్ల జైలు శిక్ష
ఉన్నత చదువులు చదివి మంచి భవిష్యత్తును నిర్మించుకోవాల్సిన ఓ యువతి జీవితం ఒక్క పొరపాటుతో తలకిందులైంది. చట్టాలపై పట్టు సాధించాల్సిన లా విద్యార్థినే చట్టాలను ఉల్లంఘించి కటకటాలపాలైంది. డ్రగ్స్ కేసులో పట్టుబడిన 23 ఏళ్ల బ్రిటిష్ విద్యార్థిని మియా ఒబ్రెయిన్కు దుబాయ్ కోర్టు యావజ్జీవ కారాగార శిక్ష విధించింది. ప్రస్తుతం ఆమె దుబాయ్ సెంట్రల్ జైలులో శిక్ష అనుభవిస్తోంది.
లివర్పూల్కు చెందిన మియా ఒబ్రెయిన్ న్యాయశాస్త్రంలో విద్యనభ్యసిస్తోంది. గతేడాది అక్టోబర్లో ఆమె దుబాయ్లో అరెస్ట్ అయింది. అప్పటి నుంచి తన కుమార్తెను చూడలేదని ఆమె తల్లి డేనియల్ మెకెన్నా (46) కన్నీటిపర్యంతమవుతున్నారు. “నా కుమార్తె తన జీవితంలో ఎప్పుడూ ఎలాంటి తప్పు చేయలేదు. దురదృష్టవశాత్తు కొందరు తప్పుడు స్నేహితులతో కలిసి ఓ తెలివి తక్కువ పని చేసింది. ఇప్పుడు దానికి భారీ మూల్యం చెల్లించుకుంటోంది” అని ఆమె ఆవేదన వ్యక్తం చేశారు.
అయితే, ఆమె కుటుంబం నేరం వివరాలను వెల్లడించనప్పటికీ, మీడియా కథనాల ప్రకారం మియా వద్ద 50 గ్రాముల క్లాస్ ఏ డ్రగ్స్ను అధికారులు స్వాధీనం చేసుకున్నారు. వాటి విలువ సుమారు 2,500 పౌండ్లు (భారత కరెన్సీలో దాదాపు రూ. 3 లక్షలు) ఉంటుందని అంచనా.
మియాకు సహాయం చేసేందుకు ఆమె తల్లి ‘గోఫండ్మీ’ ద్వారా నిధుల సేకరణ ప్రారంభించినా, ఆ సంస్థ నిబంధనలకు విరుద్ధంగా ఉండటంతో దాన్ని తొలగించారు. కొన్ని రకాల తీవ్రమైన నేరాలకు న్యాయ సహాయం కోసం నిధులు సేకరించడాన్ని తమ నిబంధనలు అంగీకరించవని ‘గోఫండ్మీ’ ప్రతినిధి స్పష్టం చేశారు.
యునైటెడ్ అరబ్ ఎమిరేట్స్లో అమలయ్యే కఠినమైన చట్టాల ప్రకారం జీవిత ఖైదు అంటే 15 నుంచి 25 ఏళ్ల వరకు జైలు శిక్ష అనుభవించాల్సి ఉంటుంది. డ్రగ్స్ అక్రమ రవాణా, హత్య, మానవ అక్రమ రవాణా, ఉగ్రవాద కార్యకలాపాలు వంటి తీవ్రమైన నేరాలకు అక్కడ ఇలాంటి కఠిన శిక్షలు విధిస్తారు. ఈ ఘటనతో ఓ యువతి బంగారు భవిష్యత్తు ప్రశ్నార్థకంగా మారింది.
