లోక్సభ ప్రతిపక్షనేత రాహుల్ గాంధీ లేవనెత్తిన “ఓటు చోరీ” ఆరోపణలతో దేశవ్యాప్తంగా పెద్ద చర్చ మొదలైంది. ఇటీవల ఆయన మరోసారి ఎన్నికల కమిషన్ (ECI) పై నిప్పులు చెరిగినా, కమిషన్ ఇప్పటివరకు స్పష్టమైన సమాధానం ఇవ్వలేదు.
రాహుల్ గాంధీ ఆరోపణల ప్రకారం, కొన్ని ప్రాంతాల్లో నకిలీ ఓట్ల చేరిక, కొందరి అసలు ఓట్ల తొలగింపు జరుగుతోందని, దీనిపై ఎన్నికల కమిషన్ వివరణ ఇవ్వాల్సిన బాధ్యత ఉందన్నారు. కానీ ఆగస్టు 17న ఒక్కసారి ప్రెస్మీట్లో మాత్రమే “ఆరోపణలు తప్పు, ఆధారాలు ఉంటే అఫిడవిట్గా ఇవ్వాలి, లేకపోతే క్షమాపణ చెప్పాలి” అని చెప్పిన తర్వాత ఈసీ మౌనం పాటించడం చర్చనీయాంశమైంది.
రాజ్యాంగబద్ధమైన, స్వతంత్ర సంస్థ అయిన ఎన్నికల కమిషన్ ఇలాంటి కీలక ఆరోపణలపై వెంటనే స్పందించాలి అని నిపుణుల అభిప్రాయం. ప్రతిపక్షం ప్రశ్నించడం ప్రజాస్వామ్య హక్కు అయినప్పటికీ, బీజేపీ మాత్రం రాహుల్ వ్యాఖ్యలను “అర్థంలేని మాటలు”గా కొట్టి పారేస్తోంది.
అయితే, బీహార్ ఎన్నికల ముందు ఈ వ్యవహారం ప్రాధాన్యం సంతరించుకుంది. ప్రజాస్వామ్యంలో ఎన్నికల వ్యవస్థపై నమ్మకం కాపాడేందుకు, ఓటు చోరీ ఆరోపణలపై ఎన్నికల కమిషన్ స్పష్టమైన సమాధానం ఇవ్వడం అవసరమని వ్యాసం సూచిస్తోంది.
