ఉక్రెయిన్పై రష్యా సైనిక చర్యలు ప్రారంభించి 1,322వ రోజుకు చేరుకున్నాయి. యుద్ధం కొనసాగుతూనే ఉండగా, రష్యా–పశ్చిమ దేశాల మధ్య ఉద్రిక్తతలు మరింత పెరుగుతున్నాయి. అమెరికా ఉక్రెయిన్కు తోమహాక్ క్షిపణులు అందించే ప్రయత్నం చేస్తోందని, అలాంటి చర్యలు జరిగితే సంబంధాలు విచ్ఛిన్నమవుతాయని రష్యా అధ్యక్షుడు వ్లాదిమిర్ పుతిన్ హెచ్చరించారు.
రష్యా విదేశాంగ ప్రతినిధి మరియా ఝకరోవా మాట్లాడుతూ “ఇది కొత్త శీతయుద్ధం కాదు, ఇప్పటికే మంటల్లో ఉన్న ఘర్షణ” అని పేర్కొన్నారు. నాటో కూటమి విస్తరణ, ఉక్రెయిన్ వ్యవహారాల్లో అమెరికా జోక్యం వల్లే ఈ పరిస్థితులు తలెత్తాయని రష్యా ఆరోపిస్తోంది.
మరోవైపు యూరప్ అంతటా కార్మిక వర్గం సమ్మెల జ్వాలలు ఎగసిపడుతున్నాయి. వేతనాలు, పని పరిస్థితులపై ఆందోళన వ్యక్తం చేస్తూ విమానాశ్రయాలు, రవాణా రంగాలు, ప్రభుత్వ ఉద్యోగులు సమ్మెలకు దిగుతున్నారు. స్పెయిన్, ఫ్రాన్స్, ఇటలీ, పోర్చుగల్, బ్రిటన్ వంటి దేశాల్లో నిరసనలు ఉధృతమవుతున్నాయి.
ఫ్రాన్స్లో రాజకీయ సంక్షోభం మరింత ముదిరింది. అధ్యక్షుడు ఎమ్మాన్యుయెల్ మక్రాన్ నియమించిన ఏడవ ప్రధానమంత్రి లికోర్ను కేవలం 26 రోజుల్లో రాజీనామా చేశారు. బడ్జెట్ కోతలు, పెన్షన్ వయస్సు పెంపు వంటి నిర్ణయాలు కార్మిక వర్గంలో అసంతృప్తిని పెంచాయి.
ఉక్రెయిన్ యుద్ధం పేరిట పశ్చిమ దేశాలు మిలిటరీ ఖర్చులను పెంచుతుండగా, సంక్షేమ పథకాలకు కోతలు విధిస్తున్నాయి. దీనికి ప్రతిగా కార్మిక వర్గం వీధుల్లోకి దిగుతోంది. ప్రపంచ రాజకీయ సంక్షోభం, ఆర్థిక ఒత్తిడి, కార్మిక ఆందోళనలు – ఇవన్నీ కలిసిపోతూ ఐరోపా ఖండాన్ని కుదిపేస్తున్నాయి.
